( عيش وشوف )
يبن بلادي عيش وشوف
شبعنا الوكت كفخات
كل يوم اليمر تتعدد الافلام
على حساب الفقير إلعاش بالحسرات
بالأمس مليارات تلفت من الماي
واليوم الحمام الوكح ماكل الحنطات
شبعنا هموم يابو هموم
نتحسر على أيامنا الحلوات
عيش وشوف يا شعب يا مسكين
بعز الصيف لبسوك الكلاوات
دولبنا الدهر دولابه خوش يدور
وكل ليل اليمر علينا بالآهات
جوع وقهر والحرمان والنوح
عام عل عام وتكثر الأزمات
الشباب مجودره وما تلكه تعيين
واولاد السياسي تنام بالحانات
شوف ابن الفقير الكاتله الجوع
وبالملاهي ابن البرلماني ينثر الشدات
إبن البلد عل الساتر نذر روحه
يحمي السياسي العاش باللذات
شوف أم الشهيد التنتظر بالعيد
متعوده عل إبنها صاحب الكلفات
تريده يفرح أطفاله بصباح العيد
يملي جيوبهم جكليت
ويطرز على خدودهم بوسات
حرايرنا محملات هموم وأحزان
وعلى جراح الأرامل تركص الرفحاويات
دوله مفرهده والخير منهوب
كتل وأحزاب وأشكال تيارات
أيس يا شعب لا ترجمه منهم خير
الخير بيدك و إنت إلتصنع الثورات
( نجاح ناجي اللوزه )
تركيا ............... 2020
No comments:
Post a Comment