حجنجلي ............ بجنجلي
كرسي إلك .... .. كرسي إلي
منصب إلك ....... منصب إلي
ويا مسعده كومي و هلهلي
خير العراق اليوم لأهل الجبلي
و ضعنا اليوم صاير مهزله
وأوضاع البلد كلها مبهذله
ما بقت عدنا شغله معدله
وحكم البلد بيد تافه سربلي
الناس ما تعرف بعد شنهو البصير
بلوه صارت و الهظم كلش جبير
صرنا ما بين الحرامي والحقير
و التحط إيدك عليه يطلع طلي
الشعب عايش بهم و تعاسه
والبلد منهوب ويلفظ أنفاسه
الأحزاب مجلبه بكرسي الرئاسه
والشعب هل يوم بيهم مبتلي
فرهدوا كل الخزينه بلا حياء
إسلامين همه وكل عباداتهم رياء
ذيول وللوطن ما عندهم ولاء
والوطن دمروا بإسم دولة علي
دوله تمشي بلا حكومه ولا رئيس
والوضع بين الكتل صاير فطيس
و الخطط عدهم عجز عنها إبليس
يردون الوضع يبقى حاله معلعلي
رواتبهم جبيره وبعد ما إلها مثيل
و المناصب خاصه بس للرذيل
لا تضن اليوم يردون الأصيل
يردون حرامي و أبد ما يخجلي
كل رئيس اليجي متريده الأحزاب
ما يهمها البلد لو صابه الخراب
يريدون الشعب يركض عل السراب
عايش بالقهر و الهم أبد ما ينجلي
أنهض يا شعبنا و إسحك الطغيان
و إسحك كل عميل البايع الأوطان
إنهض يا عراقي و إعلن العصيان
وإرفع رايتك من الهور حتى الجبلي
نجاح ناجي اللوزه
No comments:
Post a Comment